عرقين خشب
========= ( للشاعر الغنائي / محمد السيد. )
عرقين خشب
عمدان لسقالة شقـا
وايدين فقير متعلقة فى الكام جنيه
وهيعمل ايه
الدنيا أخدت ضحكته وضحكت عليه
والخوف مكتف خطوته
ويوماتى علشان لقمته
الموت بيلعب لعبته قدام عنيه
ومفيش هزار
العمر مش لعبة قمار
والتضحية...
أوقات مبتكونش إختيار
لكنه علشان الصغار
علق سنين عمره فـ هوا
عشان رغيف علشان دوا
علشان يحوش كام أمل ضد الظروف
محتاج يشوف
من تحت عقب الحلم حبة ضى جى
ويوماتي بيموت م التعب
لكنه حى
#المجد_للشقيانين
#عيد_العمال
تعليقات
إرسال تعليق