دنيا طرشه بقلم عنتر العايق
دنيا طرشه .. !!
===========
يا دنيا يا سمعاني
و برضو مترديش
هو انتي بنت اليماني
انده عليكي متجيش ؟!
****************
يا دنيا يا قرفاني
و مطلعه عينيه
أنا الغلطان وانا الجاني
مفهمتش إنك غبيه
***************
دنيا غروره و دواره
والكل فيها احتار
إللي بني قصر
واللي بني عماره
اخرتها مترين قماش
وتلبسهم بالمندار
*****************
يا دنيا اقولك تعالى
تسيبيني وتروحي للاندال
وأنا إللي غنيتلك موالي
و قلت فيكي شعر ليالي طوال
*********************
يا دنيا حظي معاكي شين
مفرقه الاحباب ما تركاشي
زعق فيكي غراب البين
خد الحلوين ما خلاشي
*******************
دنيا غداره و رديه
سقيانا المرار الوان
يا دنيا أهدي شويه
خلينا نقب و نبان
******************
يا دنيا
حظي معاكي لما اتعدل
كتبوا كتابه ع الباب
الباب من حظي قفل
والحظ اشتغل بواب
الكل زق ودخل
وانا اتلطع ع الباب
اقوله يا حظ دخلتي
يقولي متخافش هدخلك
طالما أنا البواب
وقفت سنين ملطوع
و عندي الأمل
و اخرتها طلع الحظ كداب
قولي يا حظ ايه العمل
في معاشرة الكداب
إللي سقاني المر عسل
وطبخلي العلقم كباب
حتى أنت يا حظ لما
تتعدل تطلع في الاخر هباب !!
===================
دنيا طرشه .. !!
بقلم / #عنترالعايق
تعليقات
إرسال تعليق