((رغاوي الغاوي))
=========== ( بقلم / الشاعر طارق السيد )
إحنا الناس الصايعة الضايعة
إحنا إللي أتمينا البيعة
هما الناس الآمرة الناهية
وإحنا الناس الجاهلة الطايعة
إحنا إللي مابنحب النور
إحنا إللي ماعايزينها تدور
إحنا إللي في يوم إتهورنا
وقلنا يا صابت ياإثنين عور
إحنا إحنا إللي إتسوحنا
بعد ما قلنا خلاص إرتاحنا
قالوا تعالوا هنطلع فسحة
طلعنا الفسحة ولا إتفسحنا
إحنا إحنا إللي إتمرجحنا
روحنا وجينا ياريتنا ماروحنا
زي ما روحنا زي ما جينا
بعد ماطلعت عينا وروحنا
إحنا إحنا إللي إتلخبطنا
كتبنا على الحيطة وشخبطنا
جت شخابيطنا وخربت بيتنا
قلنا ياريتنا ما يوم شخبطنا
إحنا إحنا إللي إتخزوقنا
خوازيق لكن على أذواقنا
إللي مقلوظ والمبروم
والمدهون بعسل لزقنا
آدي حكاية ناس وعدونا
زي ماياخدوا إحنا هيدونا
أخدوا التورتة ووقعوا في ورطة
وإحنا وقعنا وخدنا صابونة
===================
بقلم طارق السيد
تعليقات
إرسال تعليق