لمي رمشك للشاعر السيد طه

 لِمِّي رمشك ..!!                    

"نصف قصيدة ..!!"                   

************                      

لِمِّي رمشك من على 

حروف الكلام ... 

الحرف راشق ف الرموش ...

مش مِدِّي للشعر اهتمام ..!!!

****************** 

لِمِّي رمشك من على وزن القصيد ..

بالعند فيكي وف القوافي ... 

مش هاقول ... 

( وحيد .. شريد .. بعيد .. عنيد 

ولا أي كلمة ف نهايتها إيييييد .!!)

***************

لمي رمشك وارحمي ...

قلب اللي حب ...   

الرمش جارح والقلوب .... 

ف المعشقة مصبوبة صب ...!! 

***********************

لمي رمشك من على ... 

سطوح الجيران ... 

الرمش قاتل ... 

والقتيل بيبات مدان ..!!! 

*

************""""""""" 

لِمِّي رمشك من على ... 

ضعاف القلوب ... 

أنا قلبي عيل لسه .. 

ف كيه جي ون يا دوب .. 

مالوش نصيب ... 

يعشق ف أول رحلته ... 

أو يملا منهم شنطته .. 

والرمش فارد سطوته ... 

فوق الدروب ... 

********** 

لِمِّي رمشك ... 

من على خدود القمر .. 

ساعة أما يسرح وتسيبيه .. 

أو تسهي لحظة .. 

ف يوم عليه ... 

بيداري حسنه وتلاقيه ... 

بلغ هروب ..!!!   

*************

لِمِّي رمشك ... 

من على أبراج الحمام ... 

الغية مش حمل ... 

اللي خارج من رموشك ... 

من سهام ... !!

وانا قلبي لسه ف الغرام .. 

زغلول صَغِير   ...

لو صابه رمشك ف الهوى .. 

ممكن يطير  ... 

ويطب ساكت ف الجفون ..

يلقى له عش ... 

 بعد اما كانت غيته ... 

مابتحتويهش ... 

رمشك يصيده باحتياله ... 

ويحتويه ويضم فيه ..

يهجر ف ثانية غيته ... 

وتكوني ليه ....

ملجأ وبابه ف الغرام ...

مابيتقفلش ..!!   

**********************  

يا مزوقين سحر الرموش ... 

على مهلكم ... 

الرمش مش محتاج زواق ... 

ولا يلزموش كل القوافي .. 

ف شعركم ... 

والمدح فيه ... 

أكبر نفاق ..!!!!