قصيدة : حارتنا بقلم الشاعر طارق السيد
حارتنا --
=======
حارتي قديمة قوي جدا جدا
ساكن فيها أبا عن جدا
فيها الناس بتقوم م النوم
لما الديك في الفجر بيدن
يصحو من النوم كدا على طول
يضربوا غطس في قدرة فول
يطلعوا من قدرتهم يدعوا
يارب النعمة دي يوم ماتزول
والأحداث تبدأ في الحارة
يوماتي بصرخة ست سمارة
تلوي في بوز ها وتزغد جوزها
وتقوله إصحى أوام ياعمارة
وعم عمارة بقال الحارة
فرخ وعين أعيان هوارة
أسمع منه ولازم أصدق
لجل ماأشكك منه سيجارة
وأم علية عليها ولاد
يتفات لها بولادها بلاد
عيال تنحين رخمين رزلين
بكرش ولغد وجوز إفخاد
تقول للواحد منهم هس
أو تتهور وتقول بس
تلقاهم ركبوا على كتافك
ويقولوا حا تمشي يقولوا يس
وعم حسين عجوة العجلاتي
عامل فيها أبو زيد وزناتي
يجعر وسط الحارة مايسكت
إلا بجردل مية ليلاتي
وماننساش الست سنية
صاحبة أشهر جردل مية
ست قويةومستقوية
بصوتها الحلو وجوز ها عطية
وجوزها عطية أشهر جزار
بارم شنبه في عينه شرار
يبص البصة لسيد أفندي
تلاقي سي لفندي وقف زنهار
إكمن مراته في وسط الزحمة
تتسحب وتشم اللحمة
لمحها عطية قالت بتوحم
خايفة الواد تطلع فيه وحمة
قام سي لفندي طلب كيلو موزة
وعم عطية شارب كوز بوظة
إداله بدال الموزة عكاوي
خدها وهرب إبن المحظوظة
آدي حكايتي ياخلق في حارتي
فيها نوادر جاري وجارتي
ليها تاريخ منقوش ع الحيطة
وبالتواريخ إشهد ياجابرتي
=============== ==
بقلم طارق السيد
تعليقات
إرسال تعليق