اضربها طبنجه.. بقلم الشاعر طارق السيد
إضربها طبنجة ...
============
لو حسيت إنك متضايق
أو زهقان طهقان مش طايق
إلبس يلا إللي على الحبل
إضربها طبنجة إنزل وإتعايق
وإعمل فيها أرستقراط
وإتفلسف قول عندي ملاحظة
وإستشهد بكلام سقراط
وفكر أرسطو في نفس اللحظة
وقول إنك عندك نظرية
ينتج عنها حلول جذرية
تحل اللغز إللي محيرنا
في تكوين القشرة الأرضية
وقول باي باي أنا رايح النادي
هقابل سوزي وزيزي وشادي
فازوا عليا في رقصة كيكي
ولازم أفوز أنا في المرةادي
وبرطم وأرطن بالأفرنجي
وقول أنا مودي أقصد مزاجنجي
وإتعنطز قوي كدا بالجامد
خليك حلو ياواد وحلنجي
ومصمص في شفايفك وكإنك
آسف جدآ يعني إكمنك
كنت في رحلة صيد ع اليخت
وقت مادونا ماسألت عنك
وإن حسيت إنك لبخت
وإن الناس شكلها كشفوك
إعمل فيها إنك سخسخت
لا تلقى الناس ياجميل نفخوك
=!=================
بقلم طارق السيد
تعليقات
إرسال تعليق