طلع النهار.. للشاعر القدير / سمير محمود
طلع النهار
============
طلع النهار حاسس بخوف
من ليل بيمنع أي شوف
من عتمة رافضة تنجلي
من حلم ميت م الظروف
من شمس رافضة للشروق
من حزن عشش في الشقوق
من وغد فارض كلمته
من قلب لميزان الحقوق
من قسوة موت الضمير
من رفض تقرير المصير
من ويل و تعذيب للبشر
من عدل نايم ع السرير
من اخ واكل حق اخوه
من كل ظالم بيسيبوه
من وضع متفصل لناس
ليهم وبس بينسبوه
من كل عشاق الغباء
اللي وجودهم من هباء
اللي واخدين كل دور
واللي غاشين في السِباء(السباق)
من جرح م الناس العُزاز
من غدر بيهد الفولاذ
من اي خزلان للقلوب
من اللي فاشلين بامتياز
من كل بايع للحبيب
من كل ناكر للقريب
من كل كاره للوصال
من كل مسئول عن مغيب
من مُدّعيّن حب الوطن
ومغرقين اعظم سُفن
ومشككين ف كل طُهر
وهُمَّ غارقين ف العفن
غاب النهار وغيابه طال
ورجوعه مش صعب ومحال
رجوعه محتاج كل جهد
مش بس تغريدة ومقال !!
===================
# سميرمحمود
تعليقات
إرسال تعليق