رسالة للامة العربية.. بقلم الشاعر أيمن رضوان من مجلة واحة الشعراء
..... رسالة للأمه العربيه .....
........................................
فوقي ياأُمَّهْ كفايه كلام
فوقي ياشيخه بلاش اوهام
كل كلامك اصبح بايت
شكل رغيفك باهِت عاتِت
حتى الميه عكار وِرَتَارِتْ
فوقي ياأمه كفايه كلام
كنتي امبارح لابسه الطرحه
زي عيون البت السارحه
فاكره حبيبها جي بفرحه
اتاري الفرح صبح احلام
فوقي يله دا حلمك صدى
شاف زعبوبه قام واتْغطى
لم اتهدي الريح اهو وطَّى
وطَّى وكانت نومه مقام
فوقي تقيله عليكي الشيله
حُطي رحالك في الضليله
واحكي لينا حكايه طويله
يمكن ننسى باعونا بكام
فوقي بلاش اتْغُطِّي ف نومك
فوقي وشوفي خيبة قومك
سابو الكل وزادو فلومك
ولا اقلك سيبك منهم كله تمام
ولدك ناجح رافع راسك
وف محرابك دايماً ناسك
عمال يسرق كل أساسك
سابك تايهه اوْرَوَّح نام
والتاني واقف حارس ليكي
شمعه اتنور من حواليكي
بس خساره باع اراضيكي
لما بقيتي ياشيخه حُطام
والتالت سابك وسط الضلمه
يومك امسك ليلك عتمه
في الضهريه تشوفي النجمه
لما ابقيتي عجوزه تمام
زي الحرمه لما اتعجز
جوزها عنها راح واتعزز
ل بت صبيه عمأل يغمز
ناسي ياستي انه حرام
والتالت عايش فيها بخفه
زايع صيته كداب زفه
كل ما داقت يديها لفه
يشحت قوته من الاقزام
والرابع نايم واحد عاطل
عمال يهري عقله مراجل
شايف غيره للنور واصل
عاشها حياته حجيم وظلام
والخامس عامل فيها ابوزيد
فتنها وسابك نارها اتقيد
كل كلامه بس وعيد
عشمان يصبح م الحكام
والسادس واقف ساكت ساكن
بس بيهدر زي مطاحن
كل اولادك سكنوا مدافن
تسألي عنهم دول انعام
والسابع هاجر سايب ارضك
فرط حتي ياستي ف عِرْضِك
بعد ما جابك طولك عَرْضِك
نفسه فلقمه بعد صيام
والتامن فاتك للسوس يرعى
عامل ساسك بيت ومرعى
لما قضاها من غير صنعه
شره اهو باين فَكْ الْجَامْ
والتاسع عامل زفه وهيصه
علشان حتة بت رخيصه
سابك اهوا ياستي فريسه
تنهش فيكي كلاب لايَّام
والعاشر عامل فيها مثقف
شاعر ناعم ايوه مُرهَّف
كل كلامه عشق مُصَنَّفْ
حتى ماكاتب ليكي كلام
كل اولادك اهما فاتوكي
لجل متاع الدنيا باعوكي
لما مرضتي قاموا رموكي
بدنك دايب كله الام
حتي الأقصى كماني خانوه
خسه وغدر دول عَلَنُوه
بالتطبيع والله هانوه
أمه صحيح صبحت أقزام
فوقي ياأُمَّه كفايه كلام
فوقي ياأُمَّه كفايه كلام
..............................................
اعزكم الله وبارك لكم دمتم في رقي وتألق وابداع
ردحذف