صفحتي.. بقلم الشاعر حمدي موسي من مجلة واحة الشعراء
صفحتي
هذا المكان المنعزل في جمهورية باعشقك في السر. من قارة أمل
تعلن سفارة حضرتي عن فتح باب التقديمات للهجرة لدواعي السهر
وهنا الإقامة دائمة وبتبقي من أهل العشم في خلال ساعات
بنوفر الشمس ودفا ونوفر الحب وكفي بالحب قوت فيه الشفا من كل انواع الأهات
في البرد جاهزين بالغطا
والحضن حاجة صغنططة بنهديها لاصحاب الحاجات
مطلوب فقط صورة بطاقة ضحكتك وصحيفة الحالة القمر
وجواز سفر وان جبت روحك تضمنك بالمرة هات كعب العمل
واهو كله خير
مطلوب دكاترة للقلوب
وكمان مشايخ للي مش عاوز يتوب
عاوزين حياري ومشتاقين
لكن كفاءة ف البكا ويجيب شهادة حسن سير
وشهادة اتنين مجروحين
وعيال قتلها الحب مثلا مرتين
عاوزين صنايعية شجون... شطبنا مش عاوزين عيون
واكتملت الفرحة العدد
عاوزين مدد من ناس تطمن قلبنا
تاخد بإيدنا لشوق قديم
و لناس بتعشق عبحليم
عاوزين بشر مش زينا
عاوزين حزاني مؤهلات
وأغاني لابسه إسدالات
وهنا الحوافز مغرية
عاوزين هدوووء
علشان بنكتب شعر بدل اللي انسرق
بنغير الكلمات بنغسلها ف ورق
بنلم كل اللي انحرق ونعيد مشاعره من جديد
بنحب بطريقة فريد
وبنبني م الأحلام وطن
وبندعو للثورة علي قبح القلوب يسقط غروب الشمس يحيا صبرنا
و يعيش هوانا بدمنا وفصيلته آه
ويعيش كسوفنا
ويسقط الموت لو مكانش معاه حياة
باب المحبة هنقفله في خلال شوقين
نستقبل العشاق هنا م الفجر ولغاية غروب الشعر ف قلوب الحنين
اهلا وسهلا مرحبا بالكل
اترك نمرتك.. وهنتصل واملا استمارة باعشقك من الناحيتين
تعليقات
إرسال تعليق