الباشكاتب بقلم حمدي موسي من مجلة واحة الشعراء
الباشكاتب
آخر قصيدة كتبتها كانت شبه قلبي الجميل
وحروفها كانت مؤمنة بالحب وبتجري ورا قطط العيال
وبتلعب الأولي وبتنط الحبال
وتدوس علي معني الوجع وتغيظه وتركب له ديل
مانا باكتب الشعر
اللي يسوي عشان يشيل
شعر العيال الأشقيا ولاد الشجر والبحر وولاد النخيل
شعر الغلابة الشقيانين
وباقول كلام الناس بلهجة غلبهم
باوصف حلاوة طبعهم
وبنشتكي للشعر انا وهما وباشرح همهم
مندوب جميع الفلاحين
ومعايا توكيل من شوية ميتين
عاوزين كفن من قطن مصري لما يتحول تراب يرجع بروح المؤمنين
وجماعة منهم حلفوني بربنا اكتب عريضة... القمح مش قد العجين
والأسطوات الميكانيكية السمكرية السباكين عاوزين مكان فوق الرصيف أو تحت شجرة واسطوانة اكسجين
و الجائلين
عاوزين كرامة أي نوع
عاوزين رئيس الحي يفهم ف الدموع... يعرف يجوع.. علشان يحس الجوعانين
عاوزينه يتعلم آهات
يفهم لغات الحزن ومعاني السكات
ويجيب نهار يكفي جميع البياعين
البياعين....
زي اللي باعت نفسها بفعل المفيش
علشان تحاجي ع القطط وتلم من جتّتها عيش
فيه اللي نسيت جسمها مبقاش تبعها عشان بشر مابتختشيش
و الشحاتين .
والآه هنا.. لازم تعبر عن صحيح الحزن ف كتاب الوجع
لازم تكون من شيعة الفكرة ومن آل الحسين
الشحاتين
اللي تمعَّر خدهم والدم فارق وشهم غصباً
بفعل الذل وبجور السنين
الشحاتين..
سيبك بقي مش محتاجين.. متعودين.. عالم تنابلة وبلطجية ومجرمين... السائلين
حسم الحكاية ربنا ف سورة الضحي
فملكش دعوة انت
عشان الأمر دين
الشحاتين..
أم اليتامي والبنات
شرف الرجولة علي المحك أمام بكاء المحرومين
مانا حلو اهوه وباقول كلام زي العسل
أومال انا مش راضي ليه
وباقول لروحي ماتتلهي
جتك القرف دا شعر ده.؟ انت عبيط.؟
لازم تلف تجيب من المعني الغويط
لازم تخلي الكلمة تكره نفسها وتلعن ابوها وأمها
احسن يقولوا عليك بليد
هديك مثال..
الحب هنسميه سمك..
والشعر هنسمية لبن
والتمر هندي كناية عن انك وحيد
وبهذا تبقي عبقري وشاعر عتيد
والناس ياعم تجيب منين شاعر يفسر حلمها؟
يقعد أمام المحكمة يكتب شكاوي المظلومين
ياخد من الناس اسمها ويسجله في دار الوطن
ياخد وشوشهم يرسم الخوف والأنين
احنا شهادات الميلاد
احنا الخرايط للبلاد
احنا علي كتف الوطن زي الملايكة مكلفين
احنا ضمير الشعب.. حراس الأمل
احنا الملايكة المخطئين
بنربي جيل بدل اللي غشوه المشايخ والنخب والفنانينَ
تعليقات
إرسال تعليق