مش بالذال.. بقلم حمدي موسي من مجلة واحة الشعراء
مش بالذال
نويت امبارح الفكرة وقلت النَص بعد يومين
انا دلوقتي مش فاضي
وإحساسي مهوش عادي
ومش لاقي مكان هادي
بداخل روحي أركن فيه
واشوف انا فين
يادوبك لسه باتلفت علي المواضيع
و باتحسس مكاني لاضيع
لقيت فيه نور
فصرخت حاجة َقالت خير
فقلت قصيدة ؟
قالت شعر..... شعر كتير
فقلت اهلا ياميت مرحب هنكتب إيه؟
فقال اختار... فقلت حبيبتي
قال حاضر
فقلت بلدنا..... قال عيني
فقلت الناس
فقال تايهين ونسيوا حاجات
وحطوا حاجات علي احتمالات
ومش فاهمين. فطلعت مسخ
دوست علي الوجع دوسه بطول الصبر
ظهرت نسخ .... خدت الصورة
طبق الأصل طَلَبِتْ وصل برسوم الأمل والنور
وقفت طابور ولما جه عليا الدور
قال الحظ فات الوقت
صرخت انا كنت ماصدقت
علي وش الحياة من فوق
وكان باقي يادوب توقيع
وشرف الصبر مش ترقيع
وليلة العمر كانت بكر
وفي حضرة جناب الصمت وقف الفكر مربوطة إيديه وعينيه
قال اسمك ايه.؟
نسيت الإسم وحروفه نسيت الحلم وظروفه وراح العمر من خوفه يموت في هدوء
فادوست علي الوطن دوسه بطول الظلم ظهرت لصق
قال الشعر هنعيده ؟
هنرجع تاني لنشيده وتمجيده
لنفس الزي نفس الماسك
هنرجع تاني م الأول لنفس السطر
كنا خلاص يادوب ركعة ف صلاة الوتر
لسه هنبتدي م الفجر
ياربي عليك الأجر
دوسه أخيرة ونحدد معاها الكل
فيه تعديل بسيط جدا
مش بالذال........ صباح الفل
إضغط حفظ
تعليقات
إرسال تعليق