ترب خاصة بقلم الشاعر حمدي موسي من مجلة واحة الشعراء
تُرب خاصة
................
وانا والله باستهبل وعامل فيها واد قوال
وباشكي الحب للمارة وضيق الحال
وباتمسكن عشان الشعر يديني.. يمن عليا من عطاياه
فابقعد له في طريق القلب امد إيديا اقول لله
فيغمزني بقصيدة حب... أو يرمي في حجري بيتين
ويضغط ع الوجع يمكن أقول الآه... عشان ارتاح
وأحيانا تكون الصدقة من بسمة في وش أخيه بطعم الحب والأرواح
صباح الفل واستفتاح
فبيبان ان انا شاعر
لكن في حقيقة القصة أنا محتال
ولابس توب مهوش توبي
مداري عيوبي بالموال
وباستخدم حنان الشعر افك بكلمتين وانسي اننا أسري
وطن وعيال
وافضفض ويا خلاني عشان الخزن خلاني كأني بقيت واحد تاني
يادوبك ماشي جنب الحيط
فانا كل اما باكتب شعر بابقي عبيط
ودي درجة في هذا العصر ممتازة
تكون واحد مالوش عازة
بيكتب شعر بس خلاص
لاهو بيثور... ولا بيسأل عن المستور
ولا عاوز يشوف النور
ولا عنده أمل يبني حياته عليه....... ولا م الأصل عنده حواس
جميل الشعر بيساعدك تموت في امان
وبيوديك تُرب خاصة بتاع الخرس والعميان
فانا والله مانا شاعر أنا هربان من الصرخة عشان قفشتني وسط ميدان
انا والله مانا شاعر.. أنا بابحث في وسط الحكمة عن إنسان
تعبت لدرجة ان القلب باس روحي عشان اعفيه
وانا من كتر خوفي عليه منحته أجازة من دمي وعمري ساعات
خدوه فتحوه ومشيوا فيه وشافوا عورته وبلاويه وسمعوا منه شخصيا وسمعوا عليه
ومسكوا الشعر متلبس ولقوا بصماتي جوه عينيه
انا مضطر اكون شاعر لاني ذليل
معنديش ضهر ولاعندي لعيونك مهر يابلدي وقلبي عليل
وعلم الجرح والتعديل لا بيداوي وجع عمره ولاعمره بيمنع سد فوق النيل
فانا ساكن في بيت شعري بعقد قديم
معايا ورقه كله سليم
أبويا بناه علي ناصية وخايف اقول حروف عاصية يقولوا هاتوه
و يرموا تاريخي ويهدوه
وبالتالي حكاية الشعر دي خدعة ده أخ بيحمي عرض أخوه
تعليقات
إرسال تعليق