في سياق متصل ..بقلم الشاعر حمدي موسي من مجلة واحة الشعراء
في سياق متصل
...........................
ولحد إمتي هافهمك إن الوجع
لو زاد عن المألوف يفور
وان الأمل لو ساعة ضلمة تعكره..........
وان حلمه تاه مصادفش حد يفسره.
ممكن يثور
ولحد امتي هافهمك واشرح قانون الحب حوالين إيه يدور
كل الكلام خلصته مبقاش فيه رمق
تعبت حروف الشعر ماتت ع الورق
والصبر كان فيه وانسرق
من قلب صندوق الندور
وفي سياق متصل
القِدر ع النار والعيال شايفين من الغربال عمي
والطوب لاعمره هيستوي ولاعمره هيطيب انما...
ممكن يصيب الروح فيقضي علي الشعور
واحنا في عرض البحر وف عرض السما
تلحقنا ساعة الخوف بنور
ياصاحبي الشعر أما عني انا
انا كنت واد غلبان قوي ومالوش في طور الحكم
ولا له في الطحين
أهو حد عايش زي باقي المطحونين
يرمي بلاه ع الشعر ياخد حسنته
تقعد معاه لغاية ماتسكت معدته
وتقوم تدور بعدها على كلمتين
بيسلي يومه بنكتتين وبسخرية
وبيشكي همه للجماعة الأوليا
متعهدين الحزن من باب الشقق اللي بياخدوا الحلم وبواقي العينين
يجي الشتا أشعر ببرده وسقعته واشوف طريقة للدفا يمكن يصاحب جتته...
تمشي معايا خطوتين
وتساعي روحي تلمها
ان شالله وسط الميتين
وأحط طوبتين ع العتب علشان اخطي الصبح والحق دمعتي قبل الوجع ماينط ينعاص قلبي طين
والصيف يخش اقلع هدومي كلها وأسدُّ باب الشمس وافتح للهوا وارجوه يخلي الضل يصبر حبتين
أصل احنا ساكنين منطقة مفيهاش هوا واخدين يادوبك سلكتين
لمؤاخذة سارقين كام نفس من ريح جماعة مبسوطين
وموجهين وش الطبق ناحية روتانا عريانين
عايشن مساحة م الزمن مفيهاش مكان
ومأجرين الستر من ناس مَفضوحين
اتاريني صورة مصغرة... من مسخرة
صورة ولكن من ورا...... يعني انت مين؟
واحد انا كمالة عدد اسمه قديم
مش موضة خالص أصل أبوه راحل غشيم
بيفسر الأشياء قِسم.. ويترجم الأحوال نصيب
والظلم من أول قابيل...... والصبر فرض وفرض عين
مش بس انا اللي بافسر الهم انه دين
ودي إرادة ربنا
والأجر في الأخرة عسل علي خمر وهناك فيه مارينا وسخنة بدل العين....... عينين
علي شرط تبقي في الحياة م المرج أو سيدنا الحسين
لأ....... فيه كتير
والميتين ممكن يقوموا لو لقوا في القبر كلمة وحدووه
لو كل واد شاف اخوه.. وأخد بإيده يطمنه
لو سمعوا واحد قال أمين هتلاقي الف يأمنوا
بالله عليكي بقي اختشي
وحطي في عيونك حصوتين
تعليقات
إرسال تعليق