علي الطريق للشاعر عبدالله السايح . مجلة واحة الشعراء
............(على الطريق )..........
كنت ماشي على الطريق
كنت زهقان عقلى قالي
صديق
يمكن ألقى فيه مجال
أقدر أشكي من العيال
يمكن أنسى كل ضيق
روحت له وبعد السلام
لسه ح ابدأ بالكلام
واشتكي له م الآ لام
قام سابقني بكلمتين
كنت زهقان من يومين
قلت له بس اليومين
قال لي زهقان من سنين
زي كل الزهقانين
الشقيانين العرقانين
اللي أحلامهم تموت
واللي احزانهم تابوت
واللي كل شغلهم
بيوفرلهم بس قوت
قوت يدوب اليوم بيومه
وبكره مش قادرين نطوله
أو ننوله او يجينا او نجيله
شكلنا بكره ح ناكل
زي المواشى يدوب نجيله
قلت له اهدا وصلي
م الكلام سيب منه خلي
اصل اعصابك تجلي
قال لي مش يبقي انت خلي
اسمعني وبلاش تخلي
قلت سيبنى جيت اسلي
واشتكى لك جاى تقولى
رحت ماشي وقلت اولي
والتقتنى على الطريق
كل صدرى مليان بضيق
قلت تانى اشوف صديق
اشتكيله م الفساد
قلت يبقى الواد عماد
رحت له كان على الوساد
وكل بيته فيه حداد
قلت اسال ايه اللي فيه
لو عيان يبقى نداويه
قلت قولي:قالى ايه
قولت له اعمل طابور
الهموم سابت القصور
وجيت لنا قال ايه نحلي
قال كفايه الطيور
واللي كان منها وحصلي
واللي وصلت له ووصلي
كل عرقي فى السنين
بعت فيه حتى الانين
والحنين للجنين
كان هو اللي فاضلي
بعد غربه فى دولتين
قلت هانت واللا حانت؟
اني اكون م المرتاحين
جبت كل القرشانات
منها يبقى كتير حاجات
مشروع اربى فيه طيور
وصرفت فيه ياما قلت قول
والفلوس زى الطيور
هى دوره واحده كانت
وانفلونزا جيتنا خانت
والطيور علينا هانت
والخساره لينا بانت
والديون وقفت طابور
كل واحد قال لى هات
بعت شبكة البنات
ضعت حتى فى الثبات
كل مالي فى لحظه مات
قلت له اسكت شويه
الدموع رايحه وجايه
بتشتكي لى انت همك
وانا شكوتي باينه فى عينيه
مد ايده يشوفني مالي
قلت سيبني اروح لحالي
وكفاياك اللى جرالك
سيبني بقى للى جرالي
سبته ورجعت الطريق
من جديد نفسي فى صديق
اشتكى له من همومي
عن آلامي كل يومي
نفسي انام انا يوم خفيف
والهموم ماتكونش كيف
لحظه افكر جانى طيف
فال لي شوف عبد اللطيف
ده صديق عمر وعفيف
ياما شال من بقه لقمه
واعطاها لى فى الرغيف
خدت همى وقلت اروح له
اصله طول عمره ظريف
واما رحت عند بابه
قام فتح ليا كتابه
واشتكا لي من عذابه
قبل ما انطق او اقول
كان بايده فى جرابه
قلت مالك..قال لي مالي
قلي اعمل ايه فى حالي
زهقتني ام عيالي
مهما اجيب او اكلف
م الرخيص او حتى غالي
كل اللي بتقوله يقرف
مهما اصرف..مهما اشرف
زهقت منى عيالي
والاهانه بقت تسالى
بقضى يومي كله واقف
ف النهار او ف الليالي
واللي بخده منها أجري
انى اب ومش مثالي
زهقتنىي من حياتي
واللي باقى فى ذكرياتي
هى بتعيشه بدالي
شوف حصل لي ايه يا خلي
بعد بيتى ايه فاضل لي
قلت سيبني اروح اولي
اشتكي همي لضلى
والتقيتني على الطريق
تاني ادور عن صديق
اشتكي له م البلاوي
قلت اروح انا لسه ناوي
قلت يبقى القناوى
هو غاوب كمان حكاوي
اشتكي له كل همى
هو همه يدوب تقاوي
دكتوراه فى الجراحه
شاطر ومشرط يداوي
مستريح وبصراحه
بيحسدوه ع القهاوي
خدت نفسي لحد بابه
ماشي متحمل بحزني
قام فتح لي بكل رقه
والتقيته فى قلب حضني
والدموع من بين جفونه
من دموعىي هناك تاخدني
قلت مالك..قال لي خدني
البلد مابقتش حضني
والسفر مكتوب عليا
والحياه بتزيد فى حزني
والعيال عماله تكبر
والفلوس هناك تصيبني
وانا عمال اصبر
والعيال بدموع تكيدني
بالكلام خليك يابابا
والكئابه والرتابه
واللي بيننا يدوب كتابه
والحياه بتعاندنى
قل لى اعمل ايه ياصاحبي
العيال وهى تحبي
محرومين مني وحارمني
من وجودهم من كلامهم
من حناني ومن حنانهم
اكل عيشي هناك باعدني
والقرار صابه الدمار
واللي بيجي للصغار
هو بس اللي يفيدني
قل لي اعمل ايه يا خلي
قل لي اسافر واللا اخلي
واللا اخلي صغاري حضني
قلت سيبني .تعاندني
جيت اقول لك واشكى ذلي
جاى تقول لي
وف همومك جاى تاخدني
بعد منك ايه فاضل لي
رحت ماشي وعنه اولي
والتقتني على الطريق
والهموم هى الصديق
قلت اشكي لمين ياربي
من حياتى وم العيال
مش لاقي لي هناك مجال
ح شكي لك الحال بحال
ح شكي لك هنا في مكاني
من اليهود الامريكاني
والاحتلال اللي فى زماني
والضرائب والبطاله والمصائب
اللي منها الشعر شايب
والحكومه معذباني
واللي قام سب النبي
واللي قال عنى غبي
عمل قانون حبس الاماني
واقتصادنا الى لايص
والودان تسمع هجايص
واللي يرقص واللى مايص
ف الليالى نشوف برايص
والديابه والوساوس
خربوا حتى كياني
قل لي اعمل ايه يا ربي
آدى دمعى ومش بخبي
اشتكيلك وانت حسبي
لوحدك انت اشكى كربي
واستريح انا ويا قلبي
يمكن اقدر اعيش زماني
.........(شعر).....
عبدالله السايح
تعليقات
إرسال تعليق