الرقاصين .. للشاعر الكبير عبدالرحيم علي من مجلة واحة الشعراء
الرقاصين
________
بلاش الرقص يا معلم
وكل الخلق فاهمينك
وخلّيك فى السليم تسلم
تلاقى الدنيا فى يمينك
لمين ترقص،لمين بتهز
تعيش العمر مش عايش
وحتى إن شوفت يوم العز
ح تبقى عيشت ع الهامش
بلاش رقص الحلنجيه
وكل الخلق شايفينك
تقول الرك ع النيّة
حرام تخسر كمان دينك
كتير رقصوا ما لايموها
وراحوا فى صفحة النسيان
وحتى الذكرى ما خدوها
وسابوا الخزى للولدان
بتمسح جوخ لأسيادك
حَيَالّه فى جملة الخدام
تبات تنفخ فى جلادك
وبكره فى قبر متر تنام
تبات ملعون مالك قيمة
ومنبوز بس مش بتشوف
وعامل دينجوان سيما
وكل الناس تقول حلّوف
أمانة يا ناصر الظالم
على المظلوم ما تظلمشى
تبات والرب بيك عالم
تبات نايم ولا تقومشى
عبد الرحيم على
٨. ١. ٢٣
تعليقات
إرسال تعليق